ກະຊວງແຜນການ ແລະ ການລົງທຶນ

Ministry of Planning and Investment

MPI New Logo

ທ່ານ ສອນໄຊ ສີພັນດອນ ຖະແຫຼງຜົນງານ 45 ປີ ຂອງ ຂະແໜງແຜນການ ແລະ ການລົງທຶນ

December 03, 2020 00:00 AM

ໃນວັນທີ 1 ທັນວາ 2020, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກະຊວງ ແຜນການ ແລະ ການລົງທຶນ ໄດ້ ຕາງໜ້າໃຫ້ຄະນະພັກ, ຄະນະນໍາ, ສະມາຊິກພັກພະນັກງານລັດ ຖະກອນທົ່ວຂະ          ແໜງແຜນການ ແລະ ການລົງທຶນ ຖະແຫຼງຜົນງານ 45 ປີ ຂອງຂະແໜງແຜນການ ແລະ ການລົງທຶນ ໃນທ່າມກາງບັນຍາກາດທີ່ທົ່ວພັກ-ທົ່ວລັດ, ທົ່ວກຳລັງປະກອບອາວຸດ ແລະ ປວງຊົນລາວທັງຊາດພວມອອກແຮງແຂ່ງຂັນກັນສ້າງຜົນງານເພື່ອຂໍ່ານັບຮັບຕ້ອນ ແລະ ສະເຫຼີມສະຫຼອງວັນສະຖາປະນາສາທາລະນະລັດປະຊາທິປະໄຕປະຊາຊົນລາວ ຄົບຮອບ 45 ປີ ໃນວັນທີ 2 ທັນວາ, ວັນຄ້າຍວັນເກີດ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກ, ວິລະບູລຸດທີ່ຍິ່ງໃຫຍ່ຂອງຊາດລາວເຮົາ ຄົບຮອບ 100 ປີ ແລະ ກອງປະຊຸມໃຫຍ່ ຜູ້ແທນທົ່ວປະເທດ ຂອງພັກປະຊາຊົນປະຕິວັດລາວ ຄັ້ງທີ XI ທີ່ຈະໄຂຂຶ້ນໃນຕົ້ນປີ 2021 ທີ່ຈະມາເຖິງນີ້. ຊຶ່ງເປັນວັນປະຫວັດສາດທີ່ສໍາຄັນຂອງຊາດລາວ ໃນການປົດແອກຄອບຄອງຂອງສັກດິນາ ແລະ ພວກລ່າເມືອງຂື້ນ ເປັນເວລາຍາວນານ ໄດ້ສິ້ນສຸດລົງຢ່າງສິ້ນເຊີງ, ເປີດສັງກາດໃໝ່ແຫ່ງເອກະລາດ, ອິດສະຫຼະພາບ ແລະ ຄວາມເປັນເຈົ້າຂອງປວງຊົນລາວ.

ຂະແໜງ ແຜນການ ແລະ ການລົງທຶນ ໄດ້ປະກອບສ່ວນເຂົ້າໃນຜົນສໍາເລັດ ລວມຂອງຊາດໃນການປົກປັກຮັກສາ ແລະ ສ້າງສາພັດທະນາປະເທດຊາດຕະຫຼອດໄລຍະ 45 ປີ ທີ່ຜ່ານມາ. ເຮັດໃຫ້ປະເທດເຮົາມີສະເຖຍລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ປອດໄພ ແລະ ປວງຊົນລາວມີຄວາມສາມັກຄີເປັນປຶກແຜ່ນແໜ້ນໜາ. ສ້າງເງື່ອນໄຂເອື້ອອໍານວຍໃຫ້ເສດຖະກິດມີການເຕີບໂຕຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເປັນກ້າວໆ. ຂະແໜງແຜນການ ແລະ ການລົງທຶນ ຍາດໄດ້ຫຼາຍໝາກຜົນສຳເລັດ ເປັນຕົ້ນ (1) ລະບົບການວາງແຜນໄດ້ມີການເຕີບໃຫຍ່ເຂັ້ມແຂງຂຶ້ນ ເຊິ່ງສາມາດແບ່ງອອກເປັນ 2 ໄລຍະຍຸດທະສາ ຄືໄລຍະແຜນການຕາມກົນໄກລວມສູນ ແຕ່ປີ 1976-1985 ແລະ ໄລຍະແຜນການຕາມກົນໄກເສດຖະກິດຕະຫຼາດໂດຍມີການນຳພາຂອງພັກແລະຄຸ້ມຄອງຂອງລັດ ນັບແຕ່ປີ 1986 ເປັນຕົ້ນມາ; (2)ເສດຖະກິດໄດ້ເຕີບໂຕຢ່າງຕໍ່ເນື່ອງ ແລະ ໂຄງປະກອບເສດຖະກິດຂອງປະເທດ ໄດ້ມີການຫັນປ່ຽນຕາມທິດການຫັນເປັນອຸດສາຫະກຳ ແລະ ທັນສະໄໝ ເທື່ອລະກ້າວ; (3) ການປະເມີນຜົນໂຄງການລົງທຶນຂອງລັດໄດ້ຮັບການປັບປຸງໃຫ້ມີຄຸນນະພາບຂຶ້ນເປັນກ້າວໆ; (4) ການລົງທຶນຂອງເອກະຊົນພາຍໃນ ແລະ ຕ່າງປະເທດ ລວມທັງເຂດເສດຖະກິດພິເສດໄດ້ເປັນແຫຼ່ງທຶນທີ່ສຳຄັນປະກອບສ່ວນຕໍ່ການພັດທະນາເສດຖະກິດ-ສັງຄົມຂອງປະເທດ; (5) ໄດ້ຂົນຂວາຍການຊ່ວຍເຫຼືອທາງການເພື່ອການພັດທະນາທັງຂອບສອງຝ່າຍ ແລະ ຫຼາຍຝ່າຍ ເພື່ອປະກອບ ສ່ວນໃຫ້ແກ່ການພັດທະນາຂອງປະເທດ, ໃນນັ້ນ ການຊ່ວຍເຫຼືອຈາກ ສສ ຫວຽດນາມ ແລະ ສປ ຈີນ ໃຫ້ ນັບມື້ນັບແຕກດອກອອກຜົນ; (5) ໄດ້ເປັນໃຈກາງໃນການຜະລິດ ແລະ ເຜີຍແຜ່ ສະຖິຕິທາງການ ກ່ຽວກັບເສດຖະກິດ, ສັງຄົມ ແລະ ສິ່ງແວດລ້ອມ ແລະ ບົດຄົ້ນຄວ້າໃນຫົວຂໍ້ສຳຄັນຍຸດທະສາດ ເພື່ອຮັບໃຊ້ໃຫ້ແກ່ການສ້າງ ແລະ ຕີລາຄາແຜນໃນແຕ່ລະໄລຍະ; ແລະ (6) ວຽກງານປິ່ນອ້ອມທາງດ້ານ ພະນັກງານ, ກວດກາ, ບໍລິຫານ, ບໍລິການ ແລະ ປະສານງານ ກໍໄດ້ປັບປຸງໃຫ້ດີຂຶ້ນຕາມທິດຫັນເປັນຄຸນນະພາບ ແລະ ທັນສະໄໝ ເທື່ອລະກ້າວ.

ຄຽງຄູ່ກັບຜົນສຳເລັດທີ່ຍາດມາໄດ້ນັ້ນ ການປະຕິບັດວຽກງານຂອງຂະແໜງ ແແຜນການ ແລະ ການລົງທຶນ ຍັງມີບາງຂໍ້ຄົງຄ້າງທີ່ຈະຕ້ອງໄດ້ຕັດສິນໃຈປັບປຸງແກ້ໄຂໃນຕໍ່ໜ້າເປັນຕົ້ນ: ການສະຫຼຸບລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຍັງຂາດຖານຂໍ້ມູນພາຍໃນທີ່ເປັນລະບົບຄົບຊຸດ; ຄວາມຕ້ອງການໃນການພັດທະນາ ສໍາລັບຂະແໜງການ ແລະ ທ້ອງຖີ່ນເຂດແຄ້ວນມີສູງ ແຕ່ງົບປະມານມີຄວາມຈຳກັດ ເຮັດໃຫ້ໜີ້ສິນຈາກການລົງທຶນຂຶງລັດຍັງມີສູງ; ກົນໄກການບໍລິການລົງທຶນປະຕູດຽວຍັງບໍ່ໂລ່ງລ່ຽນ;  ຄວາມອາດສາມາດໃນການຄຸ້ມຄອງການຈັດຕັ້ງປະຕິບັດໂຄງການຊ່ວຍເຫຼືອທາງການເພື່ອການພັດທະນາຍັງບໍ່ທັນເຂັ້ມແຂງ; ແລະ ການຜັນຂະຫຍາຍນິຕິກໍາລຸ່ມກົດໝາຍຍັງບໍ່ທັນວ່ອງໄວ ແລະ ຄົບຖ້ວນ, ບາງນິຕິກຳກໍ່ຍັງທັບຊ້ອນ, ການເຜີຍແຜ່ກໍ່ຍັງບໍ່ທັນກວ້າງຂວາງເທົ່າທີ່ຄວນ.

ໃນຕໍ່ໜ້າ, ກະຊວງ ແຜນການ ແລະ ການລົງທຶນ ຈະສຸມໃສ່ປັບປຸງ ແລະ ພັດທະນາວຽກງານຕ່າງໆຕາມຄໍາຂວັນ: ເພີ່ມທະວີການນຳພາວຽກງານແຜນການ ແລະ ການລົງທຶນ ໃຫ້ມີການຫັນປ່ຽນໃໝ່ຢ່າງມີຈຸດສຸມ, ມີຄຸນນະພາບ ແລະ ທັນສະໄໝ ໂດຍສະເພາະຈັດຕັ້ງຜັນຂະຫຍາຍມະຕິກອງປະຊຸມໃຫຍ່ອົງຄະນະພັກ ກະຊວງ ແຜນການ ແລະ ການລົງທຶນ ຄັ້ງທີ IV ແລະ ແຜນພັດທະນາຂະແໜງແຜນການ ແລະ ການລົງທຶນ ໄລຍະ 2021-2025.

            ໃນໂອກາດວັນສະຖາປະນາ ສປປ ລາວ ທີ່ໝູນວຽນບັນຈົບຄົບຮອບ 45 ປີ, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກຜທ ໄດ້ ຕາງໜ້າ ຄະນະພັກ-ຄະນະນຳ, ສະມາຊິກພັກ ແລະ ພະນັກງານ-ລັດຖະກອນ ທັງໝົດ ຂອງ ຂະແໜງແຜນການ ແລະ ການລົງທຶນ ອວຍພອນໄຊອັນປະເສີດມາຍັງການນຳພັກ-ລັດ ຈົ່ງມີສຸຂະພາບເຂັ້ມແຂງເພື່ອສືບຕໍ່ຊີ້ນຳ-ນໍາພາປະເທດຊາດ ຜ່ານຜ່າຂໍ້ຫຍຸ້ງຍາກຕ່າງໆຢ່າງມີໄຊ, ກ້າວຂຶ້ນຍາດເອົາຜົນສຳເລັດຍິ່ງໃຫຍ່ກວ່າເກົ່າ ແລະ ອວຍພອນໃຫ້ ປະຊາຊົນລາວບັນດາເຜົ່າ ຈົ່ງມີຄວາມສຸກ, ມີສຸຂະພາບເຂັ້ມແຂງ ແລະ ມີຜົນສຳເລັດໃນທຸກໜ້າທີ່ວຽກງານ.

Powered by Froala Editor


ກອງປະຊຸມ ຄະນະສະເພາະກິດດ້ານເສດຖະກິດ ເພື່ອແກ້ໄຂຜົນກະທົບຈາກການລະບາດພະຍາດCOVID-19 ຕໍ່ເສດຖະກິດລາວ.

August 12, 2020 00:00 AM

ຄະນະສະເພາະກິດດ້ານເສດຖະກິດ ເພື່ອແກ້ໄຂຜົນກະທົບຈາກການລະບາດພະຍາດໂຄວິດ-19 ຕໍ່ເສດຖະກິດລາວ ຕາມຂໍ້ຕົກລົງຂອງທ່ານນາຍົກລັດຖະມົນຕີ ເລກທີ 32/ນຍ ລົງວັນທີ 3 ເມສາ2020 ໄດ້ຈັດ ກອງປະຊຸມຂື້ນ ໃນວັນທີ 20 ເມສາ 2020 ທີ່ ກະຊວງ ແຜນການ ແລະການລົງທືນ, ໂດຍ ການເປັນ ປະທານ&...


ອ່ານຕື່ມ

ພິທີເຊັນສັນຍາ ລະຫວ່າງ ລັດຖະບານ ຕ່າງໜ້າເຊັນ ໂດຍ ທ່ານ ນາງ ຄຳຈັນ ວົງແສນບູນ ແລະ ບໍລິສັດຄູນມີໄຊກໍ່ສ້າງສ້ອມແປງຂົວທາງ (KMX) ປະເທດລາວ ແລະ ບໍລິສັດລົງທຶນພະລັງງານເອໂວລູຊັ່ນ (EPIC) ປະເທດສິງກະໂປ.

August 10, 2020 00:00 AM

ບໍລິສັດຄູນມີໄຊກໍ່ສ້າງ ແລະ ສ້ອມແປງຂົວທາງ (KMX) ປະເທດລາວ ແລະ ບໍລິສັດລົງທຶນພະລັງງານເອໂວລູຊັ່ນ (EPIC) ປະເທດສິງກະໂປ ສົນໃຈລົງທຶນສ້າງໂຮງງານຜະລິດໄຟຟ້າພະລັງຄວາມຮ້ອນຈາກຖ່ານຫີນ ທີ່ສາມາດຜະລິດໄຟຟ້າໄດ້ຂະໜາດ 1.000 ເມກາວັດ ຢູ່ເມືອງດາກຈຶງແຂວງເຊກອງ ເພື່ອສົ່ງອອກໄປປະເທ...


ອ່ານຕື່ມ

ທ່ານ ປອ. ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ ເປັນປະທານຮ່ວມກອງປະຊຸມ ສຳມະນາກ່ຽວກັບຜົນສຳເລັດ ແລະບາດກ້າວຕໍ່ໄປຂອງວຽກງານເຕີບໂຕສີຂຽວ ໃນ ສປປ ລາວ.

August 10, 2020 00:00 AM

ການສຳມະນາກ່ຽວກັບຜົນສຳເລັດແລະບາດກ້າວຕໍ່ໄປຂອງວຽກງານເຕີບໂຕສີຂຽວ ໃນ ສປປ ລາວ ໃນຕອນເຊົ້າວັນທີ 21 ກຸມພາ ປີ 2020, ການເຊື່ອມສານຍຸດທະສາດສີຂຽວເຂົ້າໃນການພັດທະນາເສດຖະກິດ ແມ່ນມີຄວາມສຳຄັນ ເພາະເປັນການພັດທະນາທີ່ນຳໃຊ້ຊັບ ພະຍາກອນທຳມະຊາດ ທີ່ຈຳກັດໃຫ້ມີປະສິດທິຜົນສູງສຸດ.<...


ອ່ານຕື່ມ

ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງແຜນການ ແລະການລົງທຶນ ເນັ້ນຊີ້ນຳຊຸກຍູ້ໃຫ້ການນຳແຂວງບໍ່ແກ້ວ ແລະໄຊຍະບູລີ ເພື່ອເອົາໃຈໃສ່ປະຕິບັດແຜນພັດທະນາເສດຖະກິດຂອງແຂວງໃຫ້ບັນລຸເປົ້າໝາຍ.

August 11, 2020 00:00 AM

ໃນລະຫວ່າງວັນທີ 5-6 ມິຖຸນາ ທີ່ຜ່ານມາ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີ ກະຊວງແຜນການ ແລະການລົງທຶນ ໄດ້ເດີນທາງໄປຍ້ຽມຍາມ ແຂວງບໍ່ແກ້ວ ແລະແຂວງໄຊຍະບູລີ ເພື່ອຊຸກຍູ້ ແລະຕິດຕາມການປະຕິບັດແຜນພັດທະນາເສດຖະກິດ-ສັງຄົມຂອງສອງແຂວງ ດັ່ງກ່າວ. ເຊິ່ງທຳອິດໄດ້...


ອ່ານຕື່ມ

ສະໝັບໜຸນໂດຍ ໂຄງການລາວ 033​: ໂຄງການສ້າງຄວາມເຂັ້ມແຂງວຽກງານຄຸ້ມຄອງ ຊກພ ຢູ່ ສປປ ລາວ ໃຫ້ມີປະສິດທິຜົນ

ສະຫງວນລິຂະສິດ © 2020. ກະຊວງແຜນການ ແລະ ການລົງທຶນ

ຖະໜົນ ສຸພານຸວົງ, ບ້ານສີຖານເໜືອ, ເມືອງສີໂຄດຕະບອງ, ນະຄອນຫຼວງວຽງຈັນ

ໂທ: 021 217020, ແຟັກ: 021 217010

ອີເມວ: info@mpi.gov.la or info.mpi2020@gmail.com